【理財基本功】借錢有好野？

大叔每一兩天都會接到電話📞「先生你好，我地係XX銀行打黎。。。」，通常聽到呢句時大叔都會講「唔駛啦，拜拜。」，跟住就直接收線✂。呢啲call真係好鬼煩。。。就算真係借到錢都肯定啲利息唔會低。

不過大叔有次係FB見到SC銀行既廣告，話用佢地張信用卡經轉數快過脹，係還款期前全額歸還，就豁免任何利息同手續費。大叔當刻停左係呢個廣告上，心諗真係好著數喎，識操作既話真係好似送錢俾人咁。大叔細詳問過SC銀行後，就決定試下借一轉，跟住將借到既錢轉去按揭戶口收息，等到月底時就轉返去SC找數。由上年年尾開始，原先個推廣計劃係2個月，之後延長2個月，到而家最新消息係延長到6月30日。以10萬蚊為例，而家既利率每個月都收到3百幾蚊息🤑，雖然唔多，但呢個確實係一個超低風險既賺息方法，尤其啲錢係借返黎，不應擺落高風險投資裏面🙏。

整個過程要做既係，1️⃣SC信用卡轉數快借出金額，2️⃣跟住轉去收息戶口，3️⃣還款期前轉返去SC戶口找數，如果推廣期延長既話就再重覆一次(希望係永遠😁)。用既時間加加埋埋都應該唔駛半個鐘時間，對大叔黎講幾值得去做。

總括黎講，大叔認為以上呢個借貸係「好債」黎，因為「有現金流入」自己個袋裏面，加上風險都真係好低。但呢啲機會真係要肯去了解先會留意到，同時要肯去實行啲錢先會入到自己個袋，所以學習理財係需要，唔係既話好多機會就會白白溜走。

如果。。。可以借20萬、30萬甚至更多就好了，真係貪心🤡。

(低風險投資仍是有風險，例如按揭銀行倒閉，記得要做好功課計好數。有心理壓力可以用返自己舒服既方法去行，不要勉強自己😀)